// .. كبـوة جـواد .. //

صعب لامنك فشلت وصعب لامنك لقيت

إن من يكره نجاحك يدري انك ما نجحت

امس ضقت ورحت اقلب ذكرياتي وانتهيت

عند صورة طفل صوته مثل صوتي لا انجرحت

وش مثل ؟؟ لا والله إلا هذا أنا يوم ابتديت

انطق حروفٍ تلعثم في لساني لا انمدحت

هذا أنا يوم الحياه فنظرتي عشرين بيت

ومسجدين ومدرسه من طين كم فيها اصطبحت

هذا أنا .. وأصبحت أتمتم .. (هذا أنا) حتى بغيت

اختنق بس القدر عيّا على موتي وطحت

وصاح صوت الطفل فيني انت من وين ارتميت

قلت أنا المستقبل اللي فيه كم همت وطمحت

امس كنت أبيك تكبر بس والله لو دريت

اني اللي عشت لجله مت عندك واسترحت

لو دريت إن الزمان يجر رجلي ما عديت

ولو دريت إن البحور بلا مواني ما سبحت

كان دربك لي طويل وكل ماشفتك هويت

قلت لك كبوة جواد وما كبيت إلا وجمحت

ليه تسمعني وتمشي آه ليتك مامشيت

وآه ليتك من كثر عثرات الأيام انتصحت

ضاعت احلامي وضل الحزن فيني واهتديت

للطريق اللي يوديني على دمعي ورحت

يالحزن ليتك مثل دمعي وتنزل لارقيت

بس أعرفك لو مسحت الدمع تبقى ما انمسحت

كان حلمي في وجود إنسان يبكي لابكيت

وصار حلمي في وجود إنسان يفرح لافرحت

كنت اشوف الناس مثلي كل ما جعت وضميت

ما دريت إن الاوادم ناس فوق وناس تحت

آآآه يا أول ذكرياتي خذني فحضنك نسيت

لأسألك عن وجه ابوياللي معه ياما سرحت

خذني فحضنك ابغفى .. ياااااه مبطي ماغفيت

وان لمحت دموع عيني سو نفسك ما لمحت

خذني فحضنك وبعثر في جروحي وان قضيت

هزلي كتفي وقلي : عيب تبكي لو سمحت

اضحك وعلم زماني من أنا .. ومن وين جيت

طق باب الحزن واصرخ فيّ لامني فتحت

وضمني يمك .. وكمل ضحكتك لامن بكيت

ودي اذكر كيف كانت ضحكتي لامن فرحت




رائـعة من روائع { فَـهْـدَ المســاعد }